ቬንዙዌላ ፡ የቀድሞ የአሜሪካ ወታደሮች መፈንቅለ መንግሥት በማሴር በቬንዙዌላ 20 አመት ተፈረደባቸው

 

የቬንዙዌላ ፍርድ ቤት የአገሪቷን ፕሬዚዳንት ኒኮላስ ማዱሮን ለመጣል መፈንቅለ መንግሥት ሞክረዋል ያላቸውን የቀድሞ የአሜሪካ ወታደሮች የ20 አመታት እስር ፈርዶባቸዋል።

ሉክ ደንማንና አሪያን ቤሪ የተባሉ የቀድሞ የአሜሪካ ልዩ ኃይል አባላት መፈንቅለ መንግሥቱን ለማካሄድ በማሴር፣ ህገ ወጥ መሳሪያ ሽያጭና በአሸባሪነት ጥፋተኛ ሆነው ተገኝተዋል።

ግንቦት ወር ላይ አስራ ሶስት የሚሆኑ ግለሰቦች ባህር አቋርጠው ከኮሎምቢያ ወደ ቬንዙዌላ ለመግባት ሲሞክሩ ነው በቁጥጥር ስር የዋሉት።

ጠቅላይ አቃቤ ህግ ታሬክ ዊልያም ሳብ የፍርድ ሂደቱ እንደሚቀጥልና የከሸፈው መፈንቅለ መንግሥትን ያሴሩ በሙሉ ችሎት ፊት እንደሚቀርቡ ቃል ገብተዋል።

ጠቅላይ አቃቤ ህጉ በትዊተር ገፃቸው የተሽከርካሪዎች ምስል፣ የጦር መሳሪያዎች፣ ፓስፖርቶችና መታወቂያ ፎቶዎችን አያያይዘው "አሜሪካውያኑ ቅጥር ነፍሰ ገዳዮች፤ የከሸፈውን መፈንቅለ መንግሥት ማቀናበራቸውን አምነዋል" ብለዋል።

ፕሬዚዳንት ኒኮላስ ማዱሮ በተደጋጋሚ የአሜሪካው ፕሬዚዳንት ከስልጣን ሊገለብጧቸው እንደሚያሴሩና ሃገራቸውንም ለመውረር እንደሚያቅዱ ሲናገሩ ይሰማሉ።

ዶናልድ ትራምፕ የሶሻሊስት መሪውን ፕሬዚዳንት ኒኮላስ ማዱሮን ለአመታት ቢቃወሙም አሜሪካ አልተሳተፈችም ሲሉ ውንጀላውን ውድቅ አድርገውታል።

አሜሪካ የተቃዋሚ መሪውን ጁዋን ጓይዶን የምትደግፍ ሲሆን ዕውቅናም የምሰጠው መሪ ነው ትላለች።

ሉክ ደንማንና ቤሪ ፕሬዚዳንት ኒኮላስ ማዱሮን ለመጣል መፈንቅለ መንግሥት የማካሄዳቸውን ኑዛዜ የቬንዙዌላው ቴሌቪዥን ከጥቂት ወራት በፊት አሳይቷል።

"ዘመቻ ጌድዮን" ተብሎ በተጠራው የመፈንቅለ መንግሥት ዘመቻም መሳተፋቸውንና ፕሬዚዳንት ኒኮላስ ማዱሮን መግደል ወይም አፍኖ ወደ አሜሪካ የመውሰድ ተልዕኮም እንደተሰጣቸው ተናግረዋል።

ሉክ ደንማን ለመፈንቅለ መንግሥቱ የሚሆኑ ቬንዙዌላውያንን እንዲመለምልና ወደ ኮሎምቢያ ወስዶ ስልጠና እንዲሰጣቸው ትእዛዝ ተሰጥቶኛል ብሏል።

በመቀጠልም የሃገሪቱን አየር መንገድ በቁጥጥራቸው ስር እንዲያውሉና ፕሬዚዳንቱም ተይዘው ከሃገር እንዲወጡ አቅጣጫ መሰጠቱን ጠቁሟል።

ሲልቨርኮፕ በተባለ ኩባንያ መቀጠራቸውንም ግለሰቡ አጋልጧል። ኩባንያውን መቀመጫውን ፍሎሪዳ ያደረገ ሲሆን፤ ተልዕኮውንም የሚመሩት ጆርዳን ጎድሩ የተባሉ የአሜሪካ የጦር ኃይል አባል የነበሩ ግለሰብ ናቸው ብሏል።

ኩባንያው በመፈንቅለ መንግሥቱ ተሳትፎ እንዳለው አሳውቋል።

ዋሽንግተን ፖስት ባሳተመው መረጃ በሲልቨርኮርፕና በቬንዙላ ተቃዋሚ ፖርቲ መካከል ቬንዙዌላን ለመውረርና ፕሬዚዳንት ማዱሮን ለመጣል የ213 ሚሊዮን ዶላር ስምምነት ተደርሷል።

የተቃዋሚው መሪ ጁዋን ጉዋይዶ የጦር ኃይል አባሉን እንደማያውቋቸውና "ከተፈፀሙት ነገሮችም ጋር ምንም አይነት ንክኪም ሆነ ኃላፊነት የለኝም" ብለዋል።

በአሜሪካና በቬንዙዌላ መካከል የሻከረው ግንኙነት ወደመፋጠጥ ደርሷል። ፕሬዚዳንት ኒኮላስ አሜሪካ የተቃዋሚ ፖለቲካ ፓርቲዎች ጋር በመመሳጠር የአገሪቷን የነዳጅ ዘይት ለመዝረፍ እየሰራች ነው በማለት ወንጅለዋል።

አሜሪካና ተቃዋሚው ጁዋን ጉዋይዶ በበኩላቸው አገሪቷ ላይ የኢኮኖሚ ድቀት አስከትለዋል በማለት ይከሷቸዋል።